“Gauzak izendatuko ditut”, Las dos D

Las dos D (bi Deak) taldea osatzen dute Danieuris eta Daniellis Moya Avila ahizpa kubatarrek. Duela bi urteko udan Euskal Herrian izan ziren, eta bi hilabete pasatxotan berrogei kontzertutik gora egin zituzten. Urretxun emandako kontzertuaren harira erreportajea idatzi zuen Berrian Gorka Erostarbek. Kubako musika genero propioak ekarri zituzten gurera, habanerak, salsa eta sona kasurako, baina baita zenbait euskal kantu ere. Oraingoan, ordea, Eliseo Diego poeta kubatarraren hitzei jarritako musika dakarkizuegu, “Voy a nombrar las cosas” (Gauzak izendatuko ditut) kantua. Son en sus poemas (2014) da diskoaren izena; EGREM (Habana) estudioetan grabatu eta Ibon Larrañagak nahastu zuen Rock Izar Studion (Durango).

Uste eta espero dugu laster izanen ditugula berriz gure artean.

[youtube https://www.youtube.com/watch?v=GfQ5PiI5W9Q?list=UUxhicNHj5fM8zneHakXDscw]

“Min”, Johnny Cash

Nine Inch Nails taldearena da jatorrizko bertsioa; hala ere, Johnny Cashen ahots zahartu, zartatu eta hunkigarriak harrapatu gintuen. Musikari indar gehiago emateko, soil-soilik dakarkizuegu, bideorik gabe. Letra bihotz-urragarriaren euskarazko itzulpena azpian irakur dezakezue.

http://www.ivoox.com

/player_ek_4188318_2_1.html?data=lZalmpiVfI6ZmKiakpiJd6KnmZKSmaiRdo6ZmKiakpKJe6ShkZKSmaiRjNbm1ZCaja%2FTrM%2Fi2pCww9jMcYarpJKxw9PJsMaftMbf1M7Zq8Lm1cqah5yncZU%3D&

Nire buruari min eman diot gaur

ikusteako ea oraindik sentitzen dudan

Oinazean jarri dut arreta,

hori baita benetako gauza bakarra

Orratzak zulo bat egin dit

betiko ziztada ezaguna

Guztia akabatzen saiatu naiz

baina dena oroitzen dut

Zer bilakatu naiz?

Ene lagun laztana

Ezagutzen dudan orok alde egiten du,

amaieran

Eta den-dena eduki zenezake:

nire hondakin-inperioa

Kale egingo dizut

Min emango dizut
Arantza-koroa hau daramat buruan

gezurteroaren aulkian

hautsitako gogoetez beteta

ezin baititut konpondu

Denboraren orbanen azpian

sentimenduak desagertzen dira

zu beste norbait zara

ni hemen nago oraindik ere

Zer bilakatu naiz?

Ene lagun laztana

Ezagutzen dudan orok alde egiten du

amaieran

Eta den-dena eduki zenezake

nire hondakin-inperioa

Kale egingo dizut

Min emango dizut

Berriz hasterik banu

hemendik milioka miliatara

neure burua zainduko nuke

topatuko nuke bidea

“Mugarik ez”, Ilinx

Ilinx taldea Lviv eta Kopenhageko bi neska gaztek sortu zuten. “Gure musika sinplea da, politikoa, laguntasunean eta DIY (do it yourself) filosofian oinarritua hezurretaraino. Auto-stopean goaz gure kontzertuetara, lagunen gitarrekin jotzen dugu, eta gaztelu bat okupatzearekin amesten dugu…” diote web orrialdean. Berlinen zuzenekoak eskaini dituzte azken hilabete hauetan eta plazera da haien musika zuekin partekatzea. Informazio asko ez dagoen arren bandcamp orrialdea dute:

http://ilinx.bandcamp.com/album/demo-2012

 
[youtube https://www.youtube.com/watch?v=SUX0HhfTTNA]

Tamalez, ez dakigu lituanieraz, eta ingelesezko eta frantsesezko itzulpenak izan ditugu zubi-testu.

[youtube=http://youtu.be/EitfHNoI5a0]

EURIA ARI ZUEN (LIJO)

Zaldiak zure begien sakonean bazkan,

baina beti zeru estaliaren azpian.

Badakizkizu hitzak, urrun egiten dute ihes

orok dirudi Lego joko bat.

Zeren zu jaio zinen egunean

Euria ari zuen, euria, euria.

Zu jaio zinen egunean,

Euria ari zuen, euria, euria.

Armiarma Lego piezak

Komuneko paretetan,

zakur itsu

eta pinu enborren piezak.

Badakizkizu hitzak,

barrua urratzen dizute.

Goazen mozkortzera,

ardo zuria dut etxean.

Zeren zu jaio zinen egunean

Euria ari zuen, euria, euria.

Zu jaio zinen egunean,

Euria ari zuen, euria, euria.

Bi urte dira blog honi ekin genionetik. Aurkezpenean genioen bezala, itzulpena eta literatura ardatz hartu genituen, sortzeko, ekartzeko, eztabaidatzeko eta hausnartzeko. Helburu horrekin azpidatzi ditugu ikus-entzunezkoak, egin ditugu itzulpengintzaren nahiz literaturaren gaineko gogoetak eta kritikak, ekarri ditugu autoreak eta obrak, izan gara hitzaldi eta jardunaldietan horien kronika idazteko… Orotara 170 post jarri ditugu. Gogotsu egin dugu bidea, plazera izan da zenbait autore lehenengoz euskaraz ematea, eta poz une aunitz eman dizkigu. Zalantzarik ez dugu geuretzat aberasgarria izan dela, eta ekarpen txukuna egin dugula iruditzen zaigu, akatsak akats eta gabeziak gabezia.

Alta, ez dugu lortu hasierako helburuetako bat. Itzulpengintzaren bueltan komunitate bat sortu nahi genuen, komunitate militante, aktibo eta blog honetan aurkeztutakoen zaletasuna guk besteko pasioz biziko zuena. Aitor dugu, ez dugu jakin helburu hori transmititzen. Idatzitakoak irakurtzen dituzue, badakigu, zeuen aurrez aurreko iruzkinek nahiz atari honen tripek hori erakusten digute; zoriondu egin gaituzue behin baino gehiagotan, lan handia egiten dugulakoan. Eta hala da, lan handia da bi lagunen artean egiteko, astean kalitatezko zerbait jartzeko konpromisoa hartu genuelako eta, gehiago edo gutxiago, hala bete dugu lehenengo egunetik. Baina hitzez harago lortu nahi genuen guk, inplikazioa eta itzulpenaren bueltan bilduko zen sare bat. Ez dugu uste helburu zoroa edo harroa zenik, ongi baitakigu itzultzaile andana badagoela. Saiatu gara ateak jotzen, eta bihotzez eskertu nahi dizuegu orain arte galderei erantzun, iruzkinak idatzi edo testuak bidali dizkiguzuen guztioi, baita, nola ez, irakurtzen gaituzuenoi ere. Helmuga, hala ere, ez da hurbil, eta hutsunea handia da. Ez gara erraz amore ematekoak; horregatik, berriz luzatu nahi diogu deia itzulpen eta literaturzale komunitate kritiko horri. Ez ezin dugulako edo aspertu garelako, baizik eta sinetsita gaudelako aberasgarriago izanen dela ahots gehiagok parte hartzen badute. Guk kontent jarraituko dugu, baina ez du zentzu handirik hasierako zutabeetako batek huts eginez gero.

Zorionak geuri, bai, baina baita hau irakurtzen ari zareten guztioi ere. Eta batez ere, idatzi honen bidez botatako amuari kosk eginen duzuen horiei guztiei.